ਚਿੜੀਆਂ.. ਕੁੜੀਆਂ..ਤਾਰੇ ਤੇ ਸਾਡਾ ਆਪਣਾ ਤਾਰਿਆਂ ਭਰਿਆ ਸੰਸਾਰ..meri te HarmanJeet di chatting!

Hrmn--ਤੂੰ ਆਇਓਂ ਤਾਂ ਚੁੰਨੀ 'ਤੇ ਕੁਝ ਬੂਟੀਆਂ ਉੱਭਰ ਆਈਆਂ..

jassi--ਬੂਟੀਆਂ 'ਤੇ ਮੇਰੇ ਵਰਗੀਆਂ ਝੱਲੀਆਂ ਚਿੜੀਆਂ ਵੀ ਨੇ?? chirrp chirrp krdiyaN?

hrmn--hmmmm...ਧੁੱਪ ਪੀਂਦੀਆਂ ਝੱਲੀਆਂ ਚਿੜੀਆਂ..

jassi-ਸਭ ਦੇ ਹਿੱਸੇ ਦੀ ਧੁੱਪ ਪੀ ਕੇ ਵੀ ਸਭ ਆਪਣਿਆਂ ਬੇਗ਼ਾਨਿਆਂ ਨੂੰ ਛਾਂਵਾਂ ਦਿੰਦੀਆਂ ਚਿੜੀਆਂ ???

hrmn--hmmm....ਧੁੱਪ ਪੀਂਦੀਆਂ ਤੇ ਛਾਂਵਾਂ ਡੋਲ੍ਹਦੀਆਂ
ਬੱਸ ਮਿੱਠਾ ਮਿੱਠਾ ਬੋਲਦੀਆਂ

jassi--ਦੁੱਖ ਹਾਸਿਆਂ ਦੇ ਸੰਗ ਤੋਲਦੀਆਂ,
ਰੰਗਾਂ ਜਿਹੇ ਹੰਝੂ ਡੋਲਦੀਆਂ ...
ਵਿਚਾਰੀਆਂ ਚਿੜੀਆਂ ...

hrmn--ਕੀ ਫੋਲਦੀਆਂ
ਕੀ ਟੋਲਦੀਆਂ
ਹਿੰਝਾਂ ਵਿੱਚ
ਰਾਤ ਘਚੋਲਦੀਆਂ

jassi-ਬੁੱਲ ਸੀਤੇ ਫ਼ੇਰ ਵੀ ਬੋਲਦੀਆਂ,
ਸੱਧਰਾਂ ਮਿੱਟੀ ਸੰਗ ਰੋਲਦੀਆਂ.

hrmn--ਪੌਣਾਂ ਵਿੱਚ ਮਿਸ਼ਰੀ ਘੋਲਦੀਆਂ
ਮਿੱਟੀ 'ਚੋਂ ਨਕਸ਼ ਫਰੋਲਦੀਆਂ

jassi--ਕਿਰਨਾਂ ਸੰਗ ਮਨ ਪਰਚਾਂਵਦੀਆਂ,
ਸੂਰਜ ਨੂੰ ਹਾਲ ਸੁਣਾਂਵਦੀਆਂ...

hrmn--ਕੀ ਢੂੰਡਦੀਆਂ ਕੀ ਲੋੜਦੀਆਂ
ਕੀ ਤੋੜਦੀਆਂ ਕੀ ਜੋੜਦੀਆਂ

jassi--ਹਵਾ ਸੰਗ ਗੱਲਾਂ ਕਰਦੀਆਂ,
ਉਂਝ ਜਿਉਂਦੀਆਂ ਪਲ਼ ਪਲ਼ ਮਰਦੀਆਂ...

hrmn--ਇਹ ਤਾਰਿਆਂ ਦੇ ਫੁੱਲ ਤੋੜਦੀਆਂ
ਤੇ ਛਿੱਟ ਛਿੱਟ ਚਾਨਣ ਜੋੜਦੀਆਂ

jassi--ਤੇਰਾ ਹਾਸਾ ਨੇ ਉਹ ਮਾਣਦੀਆਂ,
ਬਾਕੀ ਖ਼ਾਕ ਹੱਡਾਂ ਦੀ ਛਾਣਦੀਆਂ...
ਤੇਰੇ ਗ਼ਮ ਉੁਦਾਸੀ ਤੋੜਦੀਆਂ,
ਸਾਹ ਸਾਹਾਂ ਦੇ ਨਾਲ ਜੋੜਦੀਆਂ.
ਚੰਨ ਤਾਰਿਆਂ ਦੀਆਂ ਸਹੇਲੜੀਆਂ,
ਜੱਗ ਭਾਣੇ ਐਵੇਂ ਈ ਵੇਹਲੜੀਆਂ...

hrmn--haan : ) ਅੱਜ ਅਸਾਂ ਤਾਰਿਆਂ 'ਨਾ
ਪਾ ਲਈਆਂ ਸਕੀਰੀਆਂ
ਖਸਮਾਂ ਨੂੰ ਖਾਣ ਮਾਏ
ਓਹਦੀਆਂ ਅਮੀਰੀਆਂ..

jassi--yess!!! ਪੀੜਾਂ ਹੰਝੂਆਂ ਦੇ ਸੰਗ ਪੀਂਦੀਆਂ..
ਫੇਰ ਵੀ ਹੱਸ ਹੱਸ ਕੇ ਜੀਂਦੀਆਂ...

ਹਾਂ pta ਕਦੇ ਕਦੇ ਜੀਅ ਕਰਦਾ ਕਿ ਚਮਕਦੇ ਚਮਕਦੇ ਤਾਰੇ ਚੁਣ ਚੁਣ ਕੇ ਇਕੱਠੇ ਕਰਾਂ ਤੇ ਤੇਰੇ ਲਈ ਇੱਕ ਮੁਕਟ ਬਣਾਵਾਂ... ਤੇ ਕਦੇ ਜੀਅ ਕਰਦਾ ਕਿ ਉਹੀ ਇੱਕ ਇੱਕ ਤਾਰਾ ਤੇਰੇ ਕਦਮਾਂ ਤਲ਼ੇ ਵਿਛਾ ਦੇਵਾਂ...ਤੇ ਉਹਨਾਂ ਹੀ ਤਾਰਿਆਂ ਤੇ ਤੂੰ ਲੰਗੜੀ ਲੱਤ ਡੀਟੀਖ਼ਾਨਾ ਖੇਡਦਾ ਮੇਰੇ ਤੱਕ ਪਹੁੰਚਦਾ
ਕਿੰਨੀ ਹੀ ਵਾਰ ਡਿੱਗਦਾ ਡਿੱਗਦਾ ਬਚੇਂ... ਬੋਚ ਬੋਚ ਕੇ ਪੈਰ ਧਰੇਂ... ਤੂੰ ਜਿਹੜੇ ਵੀ ਪਾਸੇ ਲਿਫ਼ੇ ਮੇਰੀਆਂ ਬਾਹਾਂ ਆਪ ਹੀ ਉਸੇ ਪਾਸੇ ਉੱਲਰ ਜਾਣ....
ਤੇ ਆਖ਼ਿਰ ਤੂੰ ਮੇਰੇ ਤੱਕ ਪਹੁੰਚ ਈ ਜਾਵੇਂ ਜਿਵੇਂ ਨਿੱਕਾ ਜਿਹਾ ਨਿਆਣਾ ਪਹਿਲੀ ਵਾਰ ਕਦਮ ਪੁੱਟਦਾ ਆਪਣੀ ਮਾਂ ਦੀਆਂ ਬਾਹਾਂ 'ਚ ਆ ਕੇ ਢਹਿ ਢੇਰੀ ਹੋ ਜਾਂਦੈ... ਤੇ ਫ਼ੇਰ ਹੱਸਦੇ ਹੱਸਦੇ ਅਸੀ ਲੋਟ ਪੋਟ ਹੋ ਜਾਈਏ ਤੇ ਅਖ਼ੀਰ ਆਪਾਂ ਦੋਵੇਂ ਵੀ ਤਾਰੇ ਈ ਬਣ ਜਾਈਏ.. ਉਦਾਂ ਦੇ ਹੀ ਦੋ ਚਮਕਦੇ ਟਿਮਟਿਮਾਉਂਦੇ ਤਾਰੇ ਜਿਨਾਂ 'ਤੇ ਤੂੰ ਨਿੱਕੇ ਨਿੱਕੇ ਕਦਮ ਪੁੱਟ ਕੇ ਮੇਰੀਆਂ ਬਾਹਾਂ ਤੱਕ ਪੁੱਜਿਆ ਸੀ ਤੇ ਉਹੀ ਸਿਤਾਰੇ ਜਿੰਨਾਂ ਦਾ ਮੈਂ ਮੁਕਟ ਬਣਾਉਣਾ ਸੀ.......

hrmn--ਇਹ ਤਾਰੇ :))))
ਕੁਛ ਤਾਰੇ ਤੂੰ ਪੀਪਣੀਆਂ 'ਚ ਭਰ ਭਰ ਮੇਰੀ ਹਥੇਲੀ 'ਤੇ ਰੱਖ ਦਿੱਤੇ ਸੀ..ਕੁਛ ਤਾਰੇ ਤੂੰ ਖਿੱਲਾਂ ਵਾਂਗ ਚਬਾ ਗਈ ਸੀ..

jassi--ਉਹੀ ਤਾਰੇ ਨਾ ਜਿੰਨਾਂ ਦੀ ਛਾਂਵੇਂ ਆਪਾਂ ਬੈਠੇ ਸੀ.??

hrmn--hmmmmmਉਹੀ ਤਾਰੇ...ਓਸ ਵੇਲੇ ਮੇਰੇ ਅੰਦਰ ਬਾਹਰ ਤਾਰੇ ਹੀ ਤਾਰੇ ਸੀ..ਕੁਝ ਤਾਰੇ ਕਿੰਨੇ ਹੀ ਦਿਨ ਮੇਰੇ ਲੀੜਿਆਂ 'ਚੋਂ ਨਿੱਕਲਦੇ ਰਹੇ..

jassi-ਤੇ ਉਹ ਤਾਰਿਆਂ ਦੀ ਲੋਅ ਨੇ ਕਿੰਨੇ ਹੀ ਮਹੀਨੇ ਮੇਰਾ ਆਲਾ ਦੁਆਲਾ ਰੁਸ਼ਨਾਈ ਰੱਖਿਆ...

hrmn--ਮੈਂ ਡਰਦਾ ਕੁਛ ਤਾਰੇ ਜਲਦੀ ਜਲਦੀ ਦੁੱਧ ਦੇ ਗਲਾਸ 'ਚ ਖੋਰ ਕੇ ਪੀ ਗਿਆ ਸੀ

jassi-ਤੇ ਕੁਝ ਤਾਰਿਆਂ ਦੀ ਲੋਅ ਬਚਾਉਣ ਲਈ ਮੈਂ ਵੀ ਆਪਣੇ ਹੱਥ ਪਿੱਛੇ ਖਿੱਚ ਲਏ ਸੀ ਨਾ ਚਾਹੁੰਦਿਆਂ ਹੋਇਆਂ ਵੀ..

hrmn--ਸੱਤ ਕੁ ਤਾਰੇ ਮੇਰੇ ਦਰਾਜ਼ 'ਚ ਹਾਲੇ ਵੀ ਮਘ ਰਹੇ ਨੇ..

jassi--ਕਈ ਵਾਰ ਅਜੇ ਵੀ ਮੇਰੀਆਂ ਉਂਗਲਾਂ ਦੇ ਪੋਟੇ ਹਨੇਰੇ 'ਚ ਚਮਕਦੇ ਨੇ..
ਅਜੇ ਵੀ ਕਈ ਵਾਰ ਅੰਨੇ ਟੀਰੇ ਜੱਗ ਤੋਂ ਡਰ ਕੇ ਹੱਥ ਲੁਕੋ ਲੈਂਦੀ ਹਾਂ ਮੈਂ.. ਕਿ ਮੇਰੇ ਹੱਥਾਂ ਦੀ ਚਮਕ ਕੋਈ ਦੇਖ ਨਾ ਲਵੇ..

hrmn--ਤਾਰਿਆਂ ਨਾਲ ਖੇਡਦੇ ਖੇਡਦੇ ਪੋਟਿਆਂ 'ਤੇ ਕੁਛ ਲੱਗਾ ਰਹਿ ਗਿਆ ਸੀ..ਆਪਾਂ ਓਦਾਂ ਹੀ ਘਰੋ ਘਰੀ ਚਲੇ ਗਏ..ਆਪਾਂ ਹੱਥ ਨਹੀਂ ਸੀ ਧੋਤੇ...ਆਪਾਂ ਹੱਥ ਧੋਣਾ ਵੀ ਨਹੀਂ ਸੀ ਚਾਹੁੰਦੇ..

jassi--ਕਦੇ ਧੋਵਾਂਗੇ ਵੀ ਨਹੀਂ.. ਉਸ ਰੌਸ਼ਨੀ ਤੋਂ ਬਿਨਾਂ ਕੋਈ ਵੀ ਰੌਸ਼ਨੀ ਅਨਰਥ ਐ..:))