ਤੁਕਬੰਦੀ ਕਰਨ ਦੀ ਕੋਸ਼ਿਸ਼

ਲੜਣਾ ਲੜਾਉਣਾ ਸੌਖਾ, ਪੜਣਾ ਪੜਾਉਣਾ ਸੌਖਾ,
ਸੌਖੇ ਉਪਦੇਸ਼ ਨੇ,ਅਮਲ ਔਖਾ ਕਰਨਾ....

ਹੰਝੂ ਐ ਵਹਾਉਣਾ ਸੌਖਾ,ਖਹਿੜਾ ਐ ਛਡਾਉਣਾ ਸੌਖਾ,
ਔਖਾ ਸੱਚ ਜਾਣ ਕੇ ਵੀ ਜੀ-ਜੀ ਕਰਨਾ...

ਖਿੱਚਣੀ ਲਕੀਰ ਸੌਖੀ,ਵੇਚਣੀ ਜ਼ਮੀਰ ਸੌਖੀ,
ਔਖਾ ਮੂਲ ਰਹਿ ਕੇ ਐ ਹਾਲਾਤਾਂ ਨਾਲ ਲੜਣਾ....

ਕਰਨੀ ਪੜਾਈ ਸੌਖੀ,ਫੋਕੀ ਐ ਚੜਾਈ ਸੌਖੀ,
ਬੰਦੇ ਨੂੰ ਮਨੁੱਖੋਂ ਇਨਸਾਨ ਔਖਾ ਬਣਨਾ...

ਹੋਣਾ ਛੇਤੀ ਢੇਰੀ ਸੌਖਾ, ਕਰਨਾ ਐ 'ਮੇਰੀ' ਸੌਖਾ,
ਬੜਾ ਔਖਾ 'ਤੂੰ' ਦੀ ਪਹਿਲ ਹੁੰਦਾ ਕਰਨਾ...

ਅੰਨੇ ਦਾ ਐ ਜੇਰਾ ਧੰਨ, ਛੜੇ ਲਈ ਲਵੇਰਾ ਧੰਨ,
ਚਾਹੀਦਾ ਸੁਰਗ ਸਾਨੂੰ,ਔਖਾ ਬੜਾ ਮਰਨਾ......

ਕਰਨਾ ਹਨੇਰਾ ਸੌਖਾ,ਨਿਸ਼ਚਿਤ ਜੇਰਾ ਸੌਖਾ,
ਬੜਾ ਔਖਾ ਕਿਸੇ ਲਈ ਸੂਰਜ ਬਣ ਚੜਣਾ.....

ਰਿਸ਼ਤੇ ਬਣਾਉਣਾ ਸੌਖਾ,ਜਸ਼ਨ ਮਨਾਉਣਾ ਸੌਖਾ,
ਬੁਰੇ ਵੇਲੇ ਔਖਾ ਆਪਣੇ ਦੀ ਢਾਲ ਬਣਨਾ....

ਪਸ਼ੂਆਂ ਨੂੰ ਧੂਹਣਾ ਸੌਖਾ, ਫੁੱਲਾਂ ਨੂੰ ਐ ਛੂਹਣਾ ਸੌਖਾ,
ਨੱਕ 'ਚ ਨਕੇਲ ਹੋਵੇ ਬੜਾ ਔਖਾ ਤੁਰਨਾ...

ਲਾਈਲੱਗ ਪਿੱਛੇ ਲਾਉਣਾ,ਬਲਦੀ ਤੇ ਤੇਲ ਪਾਉਣਾ,
ਔਖਾ ਅੱਗ ਉੱਤੇ ਐ ਜੀ ਪਾਣੀ ਵਾਂਗੂੰ ਵਰਨਾ(vahrna)..

ਮਾੜੇ ਨਾਲ ਖਹਿਣਾ ਸੌਖਾ,"ਖੁਸ਼ ਹਾਂ ਮੈਂ" ਕਹਿਣਾ ਸੌਖਾ,
ਬੜਾ ਔਖਾ ਖੁਦ ਅੱਗੇ ਸ਼ੀਸ਼ੇ ਮੂਹਰੇ ਖੜਣਾ........

ਡੇਰਿਆਂ ਤੇ ਜਾਣਾ ਸੌਖਾ, ਪੈਰੀਂ ਹੱਥ ਲਾਉਣਾ ਸੌਖਾ,
ਔਖਾ ਇਨਸਾਨੀਅਤ ਵਾਲੇ ਰਾਹ ਤੇ ਤੁਰਨਾ......

ਖ਼ੁਦ ਨੂੰ ਗਿਰਾਉਣਾ ਸੌਖਾ,ਵਾਹ ਵਾਹ ਕਰਾਉਣਾ ਸੌਖਾ,
ਔਖਾ ਗੁਣੀਂ ਹੋ ਕੇ ਸੱਚੇ ਕਲਾਕਾਰ ਬਣਨਾ......

ਮਾਲਾ ਐ ਚੜਾਉਣੀ ਸੌਖੀ,ਉੱਤੋਂ ਧੂਫ਼ ਲਾਉਣੀ ਸੌਖੀ,
ਔਖਾ ਉਸ ਧੂੰਏਂ ਵਿੱਚੋਂ 'ਸੋਚ' ਨੂੰ ਐ ਫੜਣਾ....

ਕਲਮ ਘਸਾਉਣੀ ਸੌਖੀ, ਬਾਬੂ(ਰਜਬ ਅਲੀ ਜੀ) ਦੀ ਰੀਸ ਲਾਉਣੀ ਸੌਖੀ,
'ਜੱਸੀ' ਬੜਾ ਔਖਾ ਹੁੰਦਾ, ਟੀਸੀ ਉੱਤੇ ਖੜਣਾ....।
jassi sangha.
2010